Nupi Thathum @ Nupi Țhațhum (Bung 2)

TIKCU NEIHSUN MAN NEI ZETIN

America ramih nu tamapi cun an nitin tikcu hman dan ding felfai ten an nei cio. An pasal le an fate an suahvah veten țuan ding ummi pohpoh an țuan. Khengkho khawlh, ihnak khan thianfai, bingbel hnawt fai le hna dangdang an țuan.

Hnațuan tam lai fangah phone a ra awn cingcing. Rualpi pakhat cu an pa thawi’ an tawhawk ruangah a ra hrang celcel. Minit kul hrawng biak hnu khalah a țawng a cem thei cuanglo, hnațuàn ding le tampi a um lai si.

Ziangkhal ti mumal loin sun hlan cu a liam zik mai. Naute rawl pek a cu lala. “A, zianghman a sawt cuang lo” a ti. Ti ding mumal thei loin coffee a in sal lala. Cui’ sun hrangah cun ti ding pahnih hril ding a nei.

Paih lo cingten a țuan ding maw, innhnen ah a leng men ding ih, nauhak tlawng tlung pawl tla a rak kawk hluaihlo ding? Pakhat khat a ti tengteng a țul.

Sibawi nupi pakhat cu kan dung laiah a ra leng duak. Zan tin a tawn mi a harsatnak thu pawl tla i ruah. A pasalin "Nazi 4:30 nat” ti'n, a hmin a phuahsak hngehnge. A rel danah cun, zaniam nazi 4:30 hrawngah hin coka-ah an to ih, zanriah hmeh ziang ka suang dingtiin khua a ruat țheu hi a si.

Cuti a um tikah a hmaisa-bik ah an vur retnak bawin a bih, a tidai retmi cu țhaten rak khal sehla ti a duh. Cui hnuah, nga le arsa a zoh lala; a pasalih duh mi ngaingai an si cuang lo ding ti a zum. Beidong thinheng cingin a fate pawl a kawm.

Nazi panga, mi tam lai fangah dawrah a va tlan lala. A ra tlun tikah Sangphut le Alu a rak tlun. A pasal a thlen tikah cun a rak bang tuk zo. A bangtuk ruangah a pasal khal a rak ñgaihsak thei nawn lo. Cui’ nun harsa cu a pasal ruangah a si ding tiin a puh lamlam.

A thinse hlawnnakah thil dangdangah a hmangaw a rak si sawn. Zan nazi 10 a kim tikah a rualpi nu thawn minit 45 sung an beaw. An biakawk sung hmuahhmuah a pasal cu TV a rak zoh. An pa-ih a pan zik khal le ziangziang simaw tham ding a hawi san men. Thil țhat ding le hna dangdang a hawlsan țheu.

A pasal cu a um a har thei zet; a thinlung sungten, “ka kiangih um a duh lo a si hi” a ti. Zianghmanah i siar lo a si ding ti a ruah ruangah a mahte-ih khunah a it men țheu. Nu tampi cun, “Um hrih, ka lo ngaihsak man lo, fate pasarih kilkhawi le mawaw retnak inn li lai kilkhawi thawn, ka bang tuk e” an ti țheu.

Cutivek nu tla-na rak si men thei. Asinan, cuvekih hnațuan tam le bangzet, Nupi Țhațhum si thei thotho tampi ka the' h mi an um. Nang khal tikcu hmanthiam na si-ah cun a neh thei dan a um thotho ding.

Charles M. Schwab an timi pa cu Bethlehem Steel Company-ih President a țuan laiah veikhat cu Management Consultant, Ivy Lee an timi cu danglam zetin a bia. Hnațuan tam thei dan ding I khihmuh hnik aw.

A țhathnem ahcun a mawi tawk paisa ka lo pe ding a ti. Lee cun Scawab cu cahnah fate a pe. “Thaisunih națuan tengteng ding mi pawl nganhnik aw” a ti. Ativekin a ngan, “A si le kha mi pawkha a dangdang ten ngansal hnik” a ti sal. Ativekin a ngan lala.

“Thaisunih na tiding mi number pakhatnak kha țheh lawlaw koin țuan aw, na țheh lai hlan lo number dang ah feh hrimhrim hlah. A sangsang ten țheh tum aw, na țheh man lo khal le pawi ti hlah, a pawimawh hmaisasa na țheh takah. Nitin ih kan hnațuan dan ding cu hitin a si.

Na tiding kha ziang tlukih tul a si ti ruat hmaisa aw. Cui’ sin na țuan dan ding ruat hmaisa aw. Na ruah vekih țuan suah tengteng tum aw. Nangmahin a țhat-dan na theimai ding ih, na hnațuan-tu dang pawl khal titer ve hai aw. Na duh tik tiang hun ti hmaisa awla, cui hnuah paisa suahnak (cheque) ka lo kuat leh ding” a ti.

Ni tam a liam man hlanah Schwab cun dollar 25,000 man cheque a ngan ih, Lee cu a kuat. Schwab-in leh hnuih a rel danah cun Lee-ih simmi hnațuan dan cu an sumdawnnakih an hlawh-tlinnak bik a si a ti. Kahpathir tuahnak hmun hmanih a țhatah cun innsang remțhatnak khalah ziangtlukin a țha ding!

Hi thil khawkhan dan pawl hi a takin hun hmang hnik. Tikcu tampi na nei thei ding ih, thil tampi na tuah thei ding. Na pasal kha a feh ihsin minit 10 hrawngah ra tlunghnik sehla ziang na bang ding? Nan innsang kha țhaten zohsal hnik aw; Bizu tla na khar țha maw? Nauhak cawkte puahnak pawl teh tapthlangah an darhaw phengpheng lai maw? Nan khengkho bal teh a um lai maw?

Lungngai duh hlah aw, a tidan a um ko, reilote sungah felten na ti țheh ko ding. Nangmai hrang khalah tikcu lawng tampi na neih phah thei ding.

(1) Cahnah le Ball-pen la awla,, thaisunih na tiding ngan suak hnik. A tam khał le a pawi lo, zamrangtei’ ti na tum mai lo ke'm. Ka rualpi pakhat cun cahnah pakhatah ngan loin cahnah dangdangah a ngan ih, hmun dangdangah a ret țheu.

Mi paklkat lala cun, “A ngan mi cu ka nei nan, ka thluak sungah an um, ca-ah cun ka ngan man lo” a ti ve. Asinan, nang cu ngansuak mai aw. Na ngan miin na thinlung a luah ding ih, thu tampi na ruat thei sawn ding.

(2) Ti ding na ngan suah mi cu a poimawh dan i zirin a sangsangten ngan sal hnik. Na pasalin ti ding a lo cah mi cu simsal țul nawn loin fel tei ti tum mai aw. A lo fial sal pang le hmin sin țha aw; na hminsin lawng hman si loin number pakhatnakah ret tengteng aw. Hnațuan har le bangthlak cu a hmaisa lamah ret awla. Kei cun cuvek cu zinglam, ka tha hiar laiah ka țuan țheu.

Zan lam, bang hnuah cun ti ci a si nawn lo. Thil dang ti ding thinlung sungih um cingih hna dang țuan cu hna a sawt thei lo. Tuisunih na țuan ngah lo mi pawl kha thaisunih țuan hmaisak dingah ret aw. Thaisunih țuan dingin na thinlung khal puahcah lawlaw mai aw.

(3) Thaisunah cun number pakhatnak ihsin țuan thawk awla, na țheh lai hlan lo țuan aw; cui’ hnuah pahnihnakah, pathumnakah tiin na țheh vivo ding. Ziang hna a si khal le laklawhin tanta hlah. Hna pakhat te kha felfai zetih na țhehah cun na lung a kim zet ding.

Sunvu țuan ding sun hlanih na theh thei sinsinah cun ziangtlukin na nuam ding. Kei cun ka țuan suah hmaisa sa ka malh vivo ih, a mal thlang cun ka thawpi ka thaw hlunhlo țheu. Na țuan lai ding mi hnakin na țheh cia mipawl thlir sal awla, na lung a hmui sawn ding.

(4) Na hminsin mi cu Note bu-ah simaw, Calender-ah simaw si thei sehla. Cule na nitin hnațuan mi a lang ringring thei ding. Ziángtikah khan a si ka thilri ka kuat? Zangtikah rualpi pawl ca ka kuat ih, ziangtikah in khirh ve? Tiin na hminsin thei ding.

Zan khatah Margaret cu mawțaw-in dawrah a va tlan; mawțaw tamzet an rak um. Cucu an biak inn kiang naite a rak si. Ziang a cang a si pei tiih a vun ruah tikah an meeting zan a rak si ziar. Chairman ding a rak si sapbai. Minit 20 lenglo a tlai zo ruangah biak inn lam cu a pan lohli ih, meeting cu a va holha.

A bazar kainak sinfen hman thleng man loin chairman a va țuan a si cu. A thaisunah Nupi Țhațhum zirnak hmunah mi zahnih a thilti sual mi a report. Ati ding kha cahnah, hnah khat parah ngan loin tape-record ah a thun ih, a hngilh pang a rak si hmang.

Nitin ka țuan ding ka ngan mi ah cun a hmaisabikah “Thaithawh khawh veten zanriah suan ding ti hi ka ngan pempem. Hiti ruah lohli cun luak a suak lamlam. Tui hlanah cun rawl khawh veten coka suahsan lohli hi ka ti-dan a sinan tu-ah cun a si nawn lo. Mizan sun lamah khan zanriah hrangah ziang ka suang ding ti ka hril cia ih, thaithawh ka khawh veten rawlsuan ka tuah țheu.

Nupi Țhațhum tamzet zinglam nazi hrawngah zanriah an suang ngah țheh zo ti tla ka thei. Cule zanlam hrangih an thin bangnak kha a hlo lohli. Innsang hrang hna dang kha zinglamah na țheh thluh thei ding. Thil țha lo lam hi cu ka ruat dah lemlo nan, ka pasal cu Sihni (lawyer a si ruangah kan rin ban lopi-ih thil ra thleng a um tik khalah man cia ih um ka tum ringring.

Curuangah timlamawknak thupte ka nei khawl ringring. Zangkim tluang zetih a fehah cun a țha mai ih, a fel tluan lo pang a si khal le ka timlamawknak phunhnih-nak cu ka hmang leh mai țheu. Rin ban loia thil hi a ra thleng țheu ngaingai. Nauhak pawl tla an na pang thei, ruaipi an ra leng thei.

A si lole ka pasalin phone-in I be pang thei; ziangmaw canah a lengih rawl ei-tlang ding khain i sawm theu. Hitiih rin lo pi thil a um țheu ruaugah nikhat daih hna ka neih mi khal ui loin a zamrang thei bikih țheh lohli ka tum. A țul canah cun timlamawknak hi phunhnih hrawng hman a si lo, phun thum lai ka nei cia țheu.

Ni khat cu rin-lo-pin kan innhnen nu a ra leng. Bang hnianghniang zet hmel a pu nan, “Tui’ sun cu ka timlamawknak panganak tiang ka hman cuteh maw! Asinan, ka buai phah tuk cuang lem lo. Tu-ah cun harsatnak sut kian dan ka thiam nasa thlang. Timlamawknak hmaisa ka hman theilo khal le a pahnihnak tal cu thatei hman ka tum thotho.

Nitin a tharih thil rung thleng mi vekih nun khawsak ka tum, ka tum vekin ka neh vivo ngai” tiin amai thu a rel suahso. Hi nu hi Nupi Țhațhum diktak cu a si. Thil feh sual ding khal na nitin timlamawknakah telh cih lawlaw awla, harnak na ton tikah a lo bawm sawn ding.

Jeim cakuat sungah, “Hniksak harsatnak a phunphun a thlen tikah mi van nei kan si tiah ruat uh; ziangahtile nan zumnakin cubangtuk hniksak harsatnak nan neh tikah tuar theinak a ra ti nan thei” (Jeim 1:2) ti kan hmu.

Pathian in thinlung harih kan um hi a siang; Amah kan rin theinak dingin. Leilung tlunih Siangpahrang fimbik Solomon khalin hi thu hi a rak thei fiang nasa. Thinlung harnak kian thei dingin nitin te Pathian hnenah a hnațuan ding hmuahhmuah a hlan ta țheu.

Na tuah mi-hmuahhmuah cu Bawipai hnenah hlan aw. Na khawkhannak cu na hlawhtling ding' (Thufim 16:3) a rak ti. Kei khalin ka hnațuan ding ka ngan suak țheh veten thla ka cam țheu; ka nun khal a nuam sinsinin ka thei. Himi dan ka tuah mi pawl a thlun theitu pawlin an hlawhtlin thu in sim sal țheu.

Mi tampi nun a danglam zo. Nang khal hun hmang vo hnik aw. Ziangvek mi khal si hman la, hnațuan na thiam sawt nasa ding. Na zum hnakin tikcu malte sungah hna tampi na țuan thei ding. Zanriah na suan țheh cun, sahpian rimthaw zet thawn ti bual awla, hnangam zetin na to men huahhi ding.

Na pasal tiangin na parah a lung a kimzet ding. Mipa pawlin feltei hnațuan hi hmuh nuam an ti thei zet. Tui’ nan umnak cu nanmai bulpak inn a si sapbaiah cun na pasal lungawinak a thuk sinsin ding. Na parih a lung a awi lawng si loin na hnațuan mi par khalah a lung a awi ding.

Nuncan khawsak dan le timlamawknak danthar na theih ruang khalah a lung a awi lala fawn ding. A lungawinak cu duhdawtnakin a thlun ding ih, na zum ban lo pin a lo duhnak a luar sinsin ding.

>>Bunghnihnak A Cem!<<