Nupi Thathum @ Nupi Țațhum (Bung 1)

ZUM VEK A VA RAK SI LO VE!

Charlie thawi kan neihawknak cu leilung tlunih thil nuam bik le ropi bik a si ding tiah ka ruat. Kan pahnihin kan neih mi hmuahhmuah pakhat hman hrelh loih pekawk kan huam. Asinan, cuvek si dingih umdan ding lawngte zianghman thiammi ka nei mumal lo.

Kan pahnih in kan thinlung khal a hmu-aw zet; kan lung put dan khal kan theihpi-aw zet. Kan duh dan khal a canaw zetin ka thei. Kan hamawk laiah cun a Dan bu tla kan innah a rung zir theu. Thubuai an rem lai khalah kan saduhthah tla kan rel thlang.

A duh zawng, a huat zawng le a thi tih zawng tiangin fiangten i sim thluh țheu. A thil zir lai thu hla i sim caanah cun ka theih ban lo mi thu pawl tiangin i sim ih, amah ka duh tuk ruangah ka theih ban lo mi thu pawl khal tha tho zetin ka rak ngai țheu.

Cutivek mi tawng duh nawn pasal ka nei ding cu vanțha ka tiaw nasa. Pasal tampi cu mai nupi khal be dah lemlo an um ti tla ka rak thei hnuaihni zo si. Nei-aw dingih thu i sim zan tla cu a țong tam nasa, kà ning zik zuakzo. Ka suahcam (Birthday) a si sapbai ih, Miami tipi kapah kan lawm.

Kan rawl ei lai khalah Charlie cu a țong rero. Tawkfangin mawțaw in tifinriat kapah kan feh. Thla thul zan a si sapbai ih, thlapi cu a vang nuam sa; tifinriat kha tleu serhso ko-in thlapi cun a tlet. Arsi pawl khal an mawi zet. Mawțaw sungah kan to ih, tisuar tla kan zoh ringring.

Ka suahcam lawmnak dingah Charlie cun laksawng a rak keng ziar. I pek mi laksawng pawl khal an mawizet, amah le duh a nungtuk fawn si. Asinan, Charlie cu ngaizawng kiangih um dan khal a thiam lo, a țong rero men.

Kan umdan ka zoh tikah țong rero nak ding tikcu a bang fawn lo. Kei lawngte hnangam zetin a țang sungah i pawm hlenhli men, ka pawm veih, a țong ka ngai. Tisuar awn le a țong awn thawn, kan rawl ei ka puar phah thawn a thu rel mi khal ngai tam man loin ka ih a hmu mai.

Ka vung sing duak a si kei cu, ka hung fim puppi ih, cuvek cu simaw ka nupi duh zawng cuvekin nangteh na um thei ke maw? tiih thu suh cu ka hun thei fangfang. Ka duh bik mi cun a nupi duh zawng le a nupi hnen ihsi a beisei mi tla a rak rel rero a rak si hmang nan, kei cun ziang thei loin ka rak ihthat san men si, a pawi ka ti zet.

Ka thang fim veten Charlie cu fiangten ka hun zoh. I pawm ih, i run huam cun kei khalin phurtuk lawlaw in ka rak hnamve, ziangtluk kan rei ti khal ka thei lo. I hnam phahin mawțaw dunglamih lungvar retnak bawm cu a hei dawh.

Zunghruk mawizet a phawrh ih, ka zaphak parah a ret. Kumkhua amai ta si dingah I dil ih, ka lungawi dan cu rel thiam ding khal a si lo. Asinan, zan varin ka it-that thei ta riai lo. A nupi hnenih a beisei mi pawl kha ziangsaw an si? Ka rak it-that rei pang maw si aw!

Rak it-that lo niagla a țhatuk ding nan! Kan pahnihih kum tampi harsatnak kan tuar ding mi tla a ken dan kan thiam deuh ding nan sikhaw aw!

Țhal tlawngpih sungah kan nei-aw ngaingai. Florida-ah honey moon kan hmang: (mothar kan lawm) a nuam ti lo cu relding dang ka thei lo. Nupi pasal neihawk cu leilung tlunih thil nuam bik a rak si ngai ti ka thei ngah. Iin-ah kan tlung ih, khaan pathum neiah nuam zetin kan khawsa.

Mi vekih kan len lo ruangah tikcu awl kan nei tam nasa. Charlie ih hnipuan tla ka bil tha ih, eiin ding timtuahin nitin ka tikcu ka hmang cem țheu. Asinan, ni le thia a rung Tei deuh deuh; kan nuncan khawsak khal a harsa sinsin.

Charlie cu țong ding a thei nawn lo; daiten amah ten a to men țheu. Cu mi ka hmuh tikah mak ka ti ngaingai, kan hla-aw deuhdeuh. Thinlung ngaiih kawmawk cu rel lo, a biakin kan be-aw lo ti tluk si thlang. A hnatuan dan le nitin ih a umdan ka suh khalah țha tei simawk hnakin a kawk in i kawk deuh ringring.

Veikhat cu ka tuar nawn lo ih, a khabe-in ka kaih sak ih, I thei lai maw? Ka mitmu hi i zoh țha hnik aw, ka lo biak rero hi ka ti ciamco. Zankhat cu keimah te thu ka ruah rero laiah hitin ka ruat suak. Charlie hi tui hlan ihsi țong neituk lemlo, mi ngawicawi a rak si zik hi.

Ka thinlung nehnak dingah a rak țong menmen a rak si hi. Ka thusuh le simmi zianghmanih a siar nawn si lo, thu pawimawh ka neih khal le ka nunaupi le ka sungkhat pawl ka ruah thlang a si kei cu ka ti-aw.

Asinan, cutiih kan țong malzet lai khalah awkam mawi zetzet kan hmang thotho. "Zangfahten ka cabu i hun lak hnik tivek cun kan țong țheu. Ziangkim a fel in a tha thluh si hmang kan ti nan a rak fel lo nasa. Mi dang cu aipuang zetin thu ka ruahpi thei nan ka pasal cu ka ruah thei nawn lo.

Thungaite ti cun ka thu rel nawmnak a hlo țheh, rel dihg zianghman ka thei nawn lo. Ka phurnak khala hlo theh. Mi lak khalah hmaitawnin to khal nungla thu rel pi ding zianghnan ka thei lo.

Ziang thu ha reipi sehla țha ding? Mi hmuahhmuah hnakin ka duhbik mi, nitin zantin ka umpi mi hnenah relpi ding zianghman ka nei nawn ta lo. Nannih cuvekin nan um ve dah maw?

Mi cu zanriah an ei lai khalah an țong celcel. Kei lawngte ka mi duhzet mi kiangah rel ding thei lo le țong ding thei loin ka um a si cu! Zan tin a zung (office) ihsin a ra tlung țheu riahsiatnak a rak tlun ringring a si bik. Keicun sunvuten ka rak hngak. A tlun tikcu hi ka hrangah lungawinak tikcu a si ding ih, ziangtinha ka rak biak ding ti tiangin ka rak ruat cia țheu.

Asinan, a ra tlun ngaingai tikah cun lungngainak süm a ra zing luailo a si ko. Kan inn-sang boruak cu a va rit lawmawm ve aw! Țhatei biakawk hnakin kan aw kan ngaimawhaw hlehle; kan lakah khamtu a um lênlên.

Kum le can a liam deuhdeuh vekin kan umdan khal a feh sual deuhdeuh. Kan lak in khamtu cu awlaitei’ pah tlang maimai theih ding a si nawn lo. Ziangruangahsaw hiti kan um, ziangtinha kan rehter ding?

Kan aipuan thei lo hi ziangmaw can le nikhat, ziangmaw can le zarhkhat, a lak le thlakhat tiangtiang tla a daih țheu. Kan nuam lo tuk lawmmam; tingaihnak dang ka thei si lo. Kan lakah hivek harsatnak a um ding ka duh lo lo thawn, ziangruangahha hiti kan um ko sawh aw! Puhmawh ding dang ka thei si lo.

Keimahte ka hun hnemaw hnik ke; mi tampi mahte hnemaw thei a um ve a si si tiin ka hun hnemaw duak țheu. Kum ziangmawzat cuti kan um hnuah fanu te, Laura timi kan nei. Ka thinlung hmuahhmuah naute parah ka ret thluh. Cuti cing cun Charlie thawi kan lak thu cu ruat loin ka um thei cuang lo. Kan lungawi ni cu nuamte ten an liam miarmo vivo ih, kan be-aw țha mumal thei nawn lo. Kawmawk can cu kan nei phahphah nan, a mal tuk țheu. Duhdaw-aw zotih kan rak kawmawk lai, ni le thla an liam lai hman thei man loih kan nom lai can te kha ka vun ngai ruahro.

Kan hnamawk lai can tla ka vun ruat sal. Charlie kha mi duhdawt thiam, mi duațhiam zet a rak si kha. Mi hnam cekco thiam, mi hnam khal a paih zet ta kha sikhaw. Tu-ah cun kan hmur dai-aw ih kan hnamawk lonak a va rei cuahco thlang ve!

Khuiah simaw duidawtu, mi virvat nawn kha a si? Kan neihawk ihsin kum rei a liam hlanah kan nun hlun le kan sulhnu ngaiin ka țap rero a si hi. Television ka zoh ih, a cangtu pa (actor)-in a cangtu nu (actress) a pawmih a hnam ka muh hin kei khal Charlie in hitin i ti ve thlang sehla maw ka ti țheu.

Ka thaw hman thaw thei nawn lo tiangin i hnam ve sehla ka va duh ve ka ti țheu. Neihawknak lam thu ca tampi ka siar ih cabu pakhatah cun hitin a um. “Neihawk tirancun duhdawtnak hi a sang zet vekin a lang țheu Asinan, a hnget lo, nuamte ten a tla niam VIVO ih, a dinnak dingah hnget zetin a ding sal țheu” tiin a um.

Neihawk sung hmuahhmuahalh duhdhwtnak hi a kelin a um thei lo a rak si ngai ding. Zan tin TV zohin a to mi ka pasal ka hmuh tikah, "A si ngai ding, kan lakah duhdawtnak thuk zet kan nei zo a si ding tiin mangbang țongin ka țong țheu. Asinan, cui boruak cu ka duh zawng a si cuang lo.

Kan fana Laura kum li a kim cun nitin Bible zirnak hmunah a feh țheu. A ra tlun tinten hla tawi tete a rak sak tlung țheu. A hla pakhat cu ziangtik lai khalah ka ai a puang ringring ti hi a si. Cu lai fangah Charlie cun mak nawnin i hun zoh. Nangmai hla ding a si cu.

Asinan, tui na hla cu ziangtik lai khalah ka me hmiauhmiau ringring ti hi a si lo ding maw? i ti. Thi zikin i hnihsan betbet. Ka thin a heng tuk; I capo maw, ka me hmiauhmiau ngai ha a si ding aw! Ka hrâng celcel nan nupi zaidam le tlaitluang ka si tiin ka ruataw ve thotho.

Harsatnak khal hi thiam zetih pahtlang thei țheuhtu ka si lo maw ka ti-aw. Cuitlunah awkam sangih mi be dah mi khal ka si lo ka ka ti-aw. Ka ruahawk dan cu a rak dik lo nasa

Asinan, cutiih hmaitawn roriih ka pasalin i ti mai cu ka pom thiam lo nasa. A thaisun cu theihtawp suahin kan inn ka thianfai, ka rualpi pawlin len in tum ruang khalah a si phah deuh. Thil dang khal ka thianfai ko nan rawl ei cabual cu tleu zetin ka hnu fai.

Charlie cu ka rualpi pawl an rat hlan deuh ah a ra tlung. A thil lei mi pawł cu a dip a dipin ka cabuai hnul fai mi parah cun khu lui lo-in a thlet huho. Ka thin heng ka sup aw thei lo a rak si hmang, ka mithmai a zoh ih, Charlie cun, "Na thin a va tawi lawmmam ve!' i ti.

Ninghang zetin kä ding ringring. Ka thin heng ve hi teh a thiang lo maw si? Mi thin tawi mi maw ka rak si tiin ka ruataw. Ziangruang ahsaw hiti ka thin a heng ringring ko sawh? Zingahsaw hiti ka um? tiin keimahte ka ngaihtua haw.

Ka umdan a dik lo a si ding; keimah le keimah hman ka duhaw thei nawn lo. Ka sungte pawl cun in duh ngaihnak ding ka thei lo. Khuisimaw țan hun la sal hnik keng. A thaizing cu hmeh thaw zet zet ka suang, nupi duhnungza si ka tum sal.

Rawl kan ei laiah Charlie cun a hnațuanpi pawl thawi an len suah ding thu i sim. Kei cun, ai a si thei lo, kan man lo ding ka ti lohli. Hnațuan ding kan neih mi pawl tla ka sim ciamco. Cu veten ka pasal hmel cu a dur khiamkhiam. Aw ring tuk si si loin, nâ nawnin, "Ziangahsaw ka thu tawlrel mi pohpoh i el vivo? i ti.

Ka lo el maw si, ka lo el lamlam lo ka ti ve. "Sunvu ten mi dang thawn thu kan el-aw. Kan iin ka thlen tikah len zan tin nang thawn kan elaw lala. Lo tawh le thu lo el khal ka paih nawn lo” in ti ta.

To Be Continued >>>          >>>Be Continued From Here

“Ka lo el lo, thu kan elawk ual lo” tiin tangdawr ka cuh lala. “Tui si cun khuimaw kan feh zik tinten minit kul tiuk duh lawngah ka lo sim ding. Timtuahawknak tikcu lawng na nei ding ih, thu kam elawknak tikuu um man loin kan feh suak mai ding? a ti.

Ka theihtawp suahih rawl ka suan mi pawi cu thulolakah an cang sal lala. Inn tlunah ka kai lohli ih, diriam zetin ka hung țap ciamco. Ka hrangah leitlun hi a cim a si lo maw! Ka thinlungih ka helhkam bik mi cu ziang khal ti zik nungla minit kul lawng tikcu ka nei țheu ding cu a si.

Kan umdan ding cu ka hrang hrimhrimah a hár tuk dingin ka thei. Charlie ih thu rel miin ka bei i dawngter; a ti taktak ding ti ka zum si. I lem dingih a hung soh duh lo ruangah keimahte ka ngui sal. Kan neihawk pek thu pawl tla ka ruat sal.

Ziangvek thil sual simaw ka tuah pang ih, hiti kan nupa boruak a siat! Nupa dang tampi hnak cun kan duhdaw-aw in, kan remaw zet laiin ka thei si. (Nupi pasal dingih kan rak hawiawk laiah khan sungril nun tiang pumkhat-awknak kan rak nei lo teh a si ke maw!

Țhenawk ngai cu kan ngam fawn si lo, kan lung a awi thei ngaingai fawn si lo. Kan ihkhun parih kan umdan tla ka suangtuah sal tikah hma lam pan cu ka si fawn si lo.

Hi thil țha lo hi a zamrang thei bikih tifel lohli a țul a si hi. Thufim pakhatin “Tu vekin lehhnu khalah” a timi hi kan hrangah cun a dik zik ta riai. Tu vekih kan um vivo a si le tui’ hnu kum hra ah cun kan hua-aw zet ding.

Thil si fangfang hi ka duh lo zawng a si i, a hmin menih nupa si (nei-aw) sapbai cu ka dun lo mi bik a si sinsin. A țha bik si ka tum; si thei ding roriin cuí zan ihsin tumtahnak felzet ka nei thlang.

Ka nuncan le umdan thleng tumin cabu phunphun ka siar thawk. Neiawknak lam thu ka hmuh mi pohpoh ka siar. Psychology lam cabu le Bible ka siar ih, ruahnak danglam zetzet ka hmuh mi pawl cu a takin ka hmang. A rah suak cu a țha nasa. Ka thinlung put dan khal ni tinin a danglam vivo.

Ka pasal Charlie khal rin lopin a rak danglam ve ta riai. Hianlai vekin i be thlang. Ziangmaw canah cun țong ding a thei tamtuk lamih, a laklawh zik țheu. Kan remaw thlang ti ka thei, neihawknak khal thil nuamzet a hung si sal. Kan lak in dangtu boruak ritpi khal an hlo țheh.

Zan khat cu kan ihkun parah to-in nazi ziangmawzat titi nuam kan rel tlang. Kan thinlung sung thu tinkim kan simaw. A duh dan le beisei mi pawl tla hmaitawnin fiangten sim thlang.

Hiti vekih thinlung sungmuril peh tlaihawknak kan hun nei theisal hi thilmak pakhat a si. Cuih zan ihsi cun kan hni, kan khek. Kan lungawi tukah kan lung lamlam a zur riangri. Kan va rak hla-aw man ve aw! Hni siamso tei kan biakawk lonak khal a va rei cuarco thlangve!

Charlie cu TV kiangah a mahte to nawn loin tokham dup parah kan pahnihin kan to tlang thlang. Innsung le leng a suhsoh phah khalah I sikhmawr phahphah. Tleirawl ngaizawngaw pekte vek kan bang lanlam sal.

Tuih hlanih kan umdan thaw cun a thlauawtuk lawmmam, a va nuam sawt ve aw! Cuti kan lak boruak a țhat sal cun kan duhawknak khal a thar deuhdeuh sal. Kei- mah vekin ka pasal khalin kan hlanlai nun kha a ngai zet ve ti ka theihpi.

Zan khat cu ihhmu thaw zetih kan ihthat laiah i țhang ih, i run pawm phahin, “Duhte, ka va lo duh lawmmam ve ti lo sim duak ka duh ruangah sokhaw ka lo țhang i ti. Khatlam a hawi sal ih, a it that hluahhlo sal.

Nannih cu zanah nan pasalin an lo duhdawt thu lo sim dingin an lo țhang țheu ding sikhaw, kei lawngte kumruk sungah vei khațe lawng ka tawng. Rei zet ka meng, kan pai thilti dan tla ka ruat vivo. Ka thinlung ten, ka nun ka thleng ih, umdan tharih ka um ruangah maw a si ding, ka pasalih umdan a rak danglam ve aw tiin khua ka ruat.

A thaizing, thawhhlam kan ei laiah kan fate pahnihhnenah, Zokhal nu a duhdawtu cu kut beng haik seh' a hun ti ta riai. Ka lung awi tukah ka khawsik sem an beu surso, An pafaza cun aipuang zetin an kut an beng. Hiti vekin ka pasalin i duhdawtnak a hun langter thei hi ropui ka ti nasa.

Zarhte sun cu Tennis leh zuamawk zoh dinginn kan feh. A auhtu pawlih an auh rin tinten ka pasal cun napi pin i rak pawm (dek) țheu. Ni dangah cun mi lakih kut kaihawk rori hman a rak duh lo sikhaw.

Cutiih a umdan a danglam ruangah kan rualpi pakhat cun, “nannih pahnih cu ziang nan cang saw?” in ti phah hngehnge. Ka thinlungte cun, a si ngai hokhaw, ziangruangah ti teh a theih na duh maw!", hun ti mai ka hiar zet.

Keimah ka danglam ruangah Charlie khal mithmuh hmaitheih roriin a danglam zutzo ve. Inn a tlun tikah Ziangmawte te i sum ringring. Tui hlanah cun cuvek a ti lai ka thei dah lo; a ti dah lo ruangah kei khalin beisei timah ka tim dah lo. Mi tirhfak a si hmang ka ti ih, kan thei thiamaw veve mai.

A rualpi pawl cun, Charie in thil a lei zik tinten zohdiknak (test) pathum a hmang țheu an ti. Cu pawl cu- (1) Kan țul ngaingai a si maw?

(2) Kan tlin ve maw?

(3) Lei lo nungla kan um thei thotho ke maw ? ti

pawl hi an si.

Number pathumnak a thlen cun zianghman a ti thei nawn țheu lo. Nikhat cu an zung ihsin phone in i run bia. Zanlam nazi pathumah kan innih ka um ding le um lo ding i run sut. Ziangruangah asi pei ti khal ka thei lo.

Asinan, nazi pathum a kim cun pakhat a ra ding. Vur tuahnak khawl (cet) a rak phur hi a rak si. Hi mi khawl lei ka ngennak cu a rei zet zo nan, ka pasalin a remti ka thei dah lo.

Kan inn luah mi pohpohah a hlunpi in a um țheu ih, khawl thar lei ka ngen tinten “A hlun a si khal le hman a theih thotho ko” i ti san men țheu. Tu-ah cun ka ngen rero țul loin a thar te i lei sak a si cuteh.

Me hmiauhmiau-ih ka to laiah kha cun kan ihkhun khan cei mawi dingin ka ngen țheu nan a duh dah lo. Ka pasal umdan le ka mit a remawk thei lo ruangah kan ihkhun khan te tlang ding hman hi harsa ka ti țheu.

Cui sapbai-ah, Charlie in, “Zohhnik aw, kan ihkhun khan a mawi tawk lo maw! Kei cu ka duhtawk zo, ceimawi rero a țul nawn lo. Kam khațe hman kan ih khun khan thu hi rel nawn hlah aw i rak ti fawn si. Cu mi i ti zan cu ka thin a pit hluahhlo. Mangbang le beidawngin ka um cuahco men.

Asinan, ka umdan ka thlengawk ihsi thla cun rei lote sungah Charlie khal a danglam sawt ve. Thawhhlam kan ei lai fangah Charlie cun, ‘Duhte ka thinlungin ka lo ruat nasa, kan ihkhun khan kha nangmai duh dan vek roriin hun cei mawi thlang hnik aw,’ tiah ka rin dan lopi in i hun ti Ka hnațuan lai cu ka ret hlukhli ih, amah tiangri ka va hmet ciamco.

Kan lakih duhdawt nak thar hung suak cun nun thar in pe sinsin. Ka thil zir le ka thu theih mi pawl tla midang khalin rak thei ve hai seh ti ka duh ruangah hi cabu khalah ka ngan suak. Ka hnenih ra zirtu pawl khal Nupi Țhațhum si dingin ka zirh hai.

Curuangah kan thu zirnak khal Nupi Thațhum zirnak tiah hmin kan sak. A pasal thawn a rak țhenaw zikte mi, ka tlawngta lakih nu pakhatin hitin i sim. An lakah țongkam țha a len lonak a rei zet zo.

Zingkhat cu coka-ih a um laiah a fanu kum nga miin a nu le a pai’ tawhawk thawmvang cu a thupten a rak ngai ringring. Hitihin a run țongsuak. “Ka upat tikah pasal ka nei lamlam lo ding. Nang le ka pai’ umdan hi ka duh hrimhrim lo a ti. A nu cun a umdan pawl a hmuaw suak sinsin, a fanu hrangah zoțhimtlak lo nu maw ka rak si ti a vun thei-aw ruangro.

Kan thu zirnak-ih ra tel pekte a si ih, zirnak a cemzik zawngih tuah ding (Home work) ka pek tikah cu nu cun “ziangtinsaw ka tuah ding” tiin a hreh zet țheu. Asinan, a thiam tawkih ti cu a tum thotho. Zarhkhat a rei hnuah kan hnenah a rasal.

Tui kar sungih ka thil hmuhsuah mi cu zum lo tlak a si. A hram ka thawh hrawngah cun ka pasal cun a biak hman i be duh lo. Sikhalsehla, ti-ding i timi cu ka ti țheh thotho. Tui hlanah cun zianghman i sum dah lo kha sikhawh, tui kar sung rori hmanah pangpar țumhnih i sum cuteh!

Cu lo khal thil dang tampi i sum țheu a ti ih, a lung awi thu a simbet ciamco. Ka rualpi hrekkhat cun hi vek thu tla mi dang simsin rero a țul maw si in ti țheu. Asinan, ka nunnakah danglamnak a um si, mi zo talin simaw țhathnemnakih an hman phah dingah cun ka ui thei lo rori ka ti țheu.

Hi cabu na siar ihsin NUPI ȚHAȚHUM na si thei ih, tui hlan hnakin na pasal thawi nan duhawk sinsin theiah cun ka țuan bangnak hmuahhmuah hi man nei zetin ka ruat ding.

>>Bungkhatnak A Cem!<<