POM MAI AW
Sandy lee Tom cu ka mi theih mi, an hamawk lai ihsin an neihawk hnu tiangah ka mi theihmi an si. An neihawk hnuih harsatnak an tonmi pawl theihpitu khal ka si thotho. Sandy cu Nupi Ṭhaṭhum zirnak hmunah a ra telve. Rei nawn a zir hnuah an nupa thuhla hitin cain i rak sim.
Kum hnih liam zo-ah khan “Kam ngam e” ka rak ti. Asinan, ka thinlung sungah cun ka pasal nun thlengter ding lawnglawng ka ruat. A netnakah ton lo ka tong, ka buai curco. Tu-ah cun ka pasal nuncan thlengter ka tum mi cuka bansan zo ih, a sinak cekci-in ka pom mai.
Mi tharah kan cang ih, nupa nei-aw thar (mo thar)-ah kan cang dah riangri. Na thuzirhnakih ka tel theive ruangah ka lung a awi ngaingai” tiin, A si ngai, nu tampiin pasal kan neih tikah kan pasal pawl nuncan thleng kan tum cio.
Kan neihawk sung hmuahhmuah deuh thaw, cu mi hrangah kan tikcu kan hmang ṭheu. Ziangahsaw, cutivekih kan at duh rero ? Mipa pawl cun an sinak vekih paom mai an duh bik; na pom theiah cun na duhdaw ngaingai a si ti an thei ding. Anmah lawng maw cuti pawm duh kuahko? Si lamlam lo, nang khalin na duh kha, kei khalin ka duh ve.
Mi hmuahhmuah in kan duh cio. Rualpi ṭhazet, na thinlung sung thuthup khal na sim ngam mi, na sinak vekih a lo pom theitu teh na hmu dah maw? Kei cu ka ne sokhaw. Inn lengah kan to tlang ih, kan duhduh thunuam kan rel ṭheu. Cu lole phone tla in thu kan rel tlang ṭheu.
Ka thinlung phurrit hmuahhmuah ṭhumawknakah ka hmang ṭheu. A hnen ihsin sawiselnak simaw, a thu el zawngin simaw, thu fawrh lam simaw nei loin a kiangah to khiaukhi in, a sinak vekih pawmin ka kawm ṭheu. A kiangah cun mi dang nun cawn khal a ṭul lo.
Ka thu sim mi a ngai ih, i duhdaw kuahko a sibik. I duhdawt vekin kei khalin ka duh duahdo ve ta rori. Cuhnakih niam cun na pasal parah na tithei ding maw si? Na rualpi cu a sinak vekih na pawm mai vekin na pasal khal na pom thei mai lo maw ? Cucu hokhaw na pa salih duh bik mi cu! Na pawm theiah cun na kiangih um a khawp thei lo ding.
Mi tirhfial hi ka mizia hrimhrim a si thei men. Ka tum cia lo khal le ka rak ti pang ṭheu. Sunvu in ka fale pawl hi an ṭuan ding ka sim celcel ringring. “Nan hnipua sawp uh, nan ha (ka) ṭhuah uh, it ringring hlah uh ti vekin ka fial ringring. Ka pasal a ra tlun tikah, hnawmbawm kha hei hlawn duak hnik, ka nu hi duatve hnik aw. Mi an ra len le mithmai pante thawn rak beve aw,” tiin ka fial ringring.
Kum ruk sung rori cuti vekin Charlie cu ka ti tingring. A netnakah cun a tuar thei nawn lo. Zankhat cu aw cang fahranin, “Tirhfial na hmangtuk hi bang thlang aw. Na rel mi cu na rel hlanin ka thei cia ṭheh, na fate ka si lo, na pasal ka si hi” i ti ciamco.
A tirah cun ka hua zik zuakzo nan, a thu timi cu ka thiniuhg sungah a nung ringring. Hnawmhne hlawn dingin fial lo ningna teh a hlawn thotho ke maw? ka ti. Tirh ka fial tintein Charlie ih um dan le a hmel ka vun ruatsal.
Ṭuan ding ka simih daitei a to men lole, a hrang ciamco ṭheu. “Hnawm hlawn dingin tui zan rori hmanah vei li lai i fial zo. Mi tirhfial na ban loah cun ka hlawn nawn lo ding. I fial lo khal le hnawm hlawn cu ka ti dingih ka ruah mi hrimhrim a si” a ti.
Ka thinlung ten siter ka duh dan kalh zawng cekci-ih um a rak tum ve si, keimai duhnak lam in flal nawn loin amai’ ti ṭheu mi cu fak sawn ningna thil ṭha sawn ding hi a rak si nan tiin ka ruatsal. Nu ei tuar vekin ka pasal cu ka duh duhih merh ka tum ruangah i duh sinsinnak ding ka thei fawn lo.
Hiti ka fial ringringah cun I hua sinsin lam ding maw, kan inn ih um hman nuam a ti nawn lo ding ih, rualpi dang thawi’ lensuah tla nuam a ti sawn ding aw ti tiang ka ruat cu lo a si le nunau dang, amai’ sinak vekih rak pom theitu, a ṭhatnak zawnte rak fak thiamtui' hnenih um hman nuam a ti sawn ding sikhaw ka ti thul.
Cutivek si ngaingai pang sehla kan nupa nun cu ziangtlukin a nuam lo ding ti tiangin ka vun ruat sau vivo. Fiang zetih ka hmuhsuah mi cu tirh ka fial rero mi hin rah ṭha zianghman a suah cuang lo ti-hi a si. Cui zan ihsi cun hnawm hlawn dingin Charlie cu vei khaṭe hman ka fial nawn remrem lo.
Zarh hnihthum sung khal hlawn ioih a um khal le daitei um thotho ka tum. Asinan, a zan hmaisabik ihsin fial ṭul loin a hlawn ringring cuteh. Ka fial ding hnak cun keimah sawnin ka ti mai ṭheu. Veikhat ka rel ding ih, cui hnu cu amai’ thuthu a si mai ka ti.
Nu pakhat cun pasal pawl hardamnak dingah hnaṭuan tla fial ṭheu dingin a rualpi dang pawl a fawrh ṭheu. A sim danah cun an pasal pawlin rawl an ei tamtuk simaw, zu an in tamtuk simaw, kuak an fawh tamtuk ruangih harsatnak an ton tikah ṭhatei sim ding an si ih, taksa cangvaihnak khal nei dingih forhfial ding an si a ti.
Mai pasal a duhdawt-tu nu hmuahhmuah in an pasal pawl ṭhaten nun an sim ṭheu ding, cule an dam rei phah ding a ti ṭheu. Asinan, a rualpi nu pakhat cun fim nawnin, “Na thu cu ka pom zawng a si lemlo. Cuvek rori cun zosaw a dam rei paih ding? Cutivekih tirh fialawk ringring le hnațuan dingih nawrawk ringring tla cun zohman a damter lo ding. Sungkua ṭhenawknak men a si lo ding maw!” tiah a sawn.
Hrân le kio na hiartuk le, a bang hnianghniang mi na pasal hnenah hrang loin na rualpi ṭha hnenah hrang sawn aw. Mi soisel hmang ding na si-ah cun na bang thei lohli lo men ding. Curuangah a tir ihsin ti lo lawlaw mai awla a ṭha sawn ding.
Cumi ti thei ding cun na sinak le na hnaṭuan dan pawl zep le thuh nei loin phuang mai aw. Na tlin lonak khal zep duh hlah. Veikhat te na pasal sinak vekih na pom thei-ah cun na fial le na tirh rero khal a ṭul nawn zik lo. Ka sinak vekin i pom ti a lo theihah cun a lungawi vanpi a tia ding.
Veikhat cu kum 18 hnuih a um dan a thlengtu nu-in hitin thu a rel. "Mangbangza thil a thleng ta riai, a thil ti sual mi khal thil pawimawh ngaingai a si lemlo. A nuncan ṭhatnak zawnte lawng ka ruat ih, tui hlan hnakin ka duh sinsin cuteh" tiin. Kan sinak vek cekei-ih pawmawk cu. thil thar ciamco khal a si lo. Pathian khalin ka sinak vekin a si in pom. Kan phu lo tiangtiangin in duhdaw sawn lam.
Ziangti kan um ruangih in duh tikhal rel a si dah lo, in duh ruangah in duh ih, kan sinak vekin in pom a si mai. Na pasal cu na pasal a si, a sinak cu amai’ sinak a si. A sinak vekih na pom theilo ahcun nan lak thu cu a buai vutvo mai ding. Thinlung harih um na duh le pom lo mai awla, nuam zetih um na duh le pom lohli mai aw. Nangmah na duhduh hril ding a um.
Na thinlung sungah a nuncan le a mizia thleng tum remrem loin pom cutci mai aw; cucu a si dahdawtnak sangbik cu! Nupa tuakkhat tei’ parih thil thleng ka hmuh mi cu hminsin tlak ka ti. A nupi cun a pasal thinlung thleng dingin reizet a ruat. Asinan, rei lote sungah an pa cun a theithiampi mai. “A va danglam lawmmam ve, anih khal i duhdaw sinsin in ka thei, tirh khal a siang sinsin.
Ziangtik lai khalah paisa pek i duh ih, a lungawinak dingah tiih i pek mi cu ka rak la ṭheu” tiin cu nu cun i sim dah. Nu hrekkhat cun an kaa lengin an ṭong lo khal le an pasal pawl lakah phut le beisei an nei ringring. An pasal pawl an hlawhsam canah an bei a dawng, an phunciar. An pasal ti ngam lo ruangah an fate pawl par lamlam ah an thin hengnak an langter.
Mawhthluk ding le phun le hran ding lawngläwng an hawl. An pasal pawl sawn cun an hlawhsam lai le an beidong lai fangih an sinak vekih rak pomtu le duat-tu an ngai cuang a rak sisi. Mipa dang thawn na pasal cu tahṭhim hlah. Mi phunciar hmang le sawisel hmang na si ahcun a thuthup tla a lo ruah siang dah lo ding.
Lei par nun a tawi tawi thawn, midang tlinlonak rori helhkam cu a va bang tlhak lawmmam ve! Thildik le mawl khal a si zik lo. A tlinnak lam kha theih tum sawn hnik. Nangmahin na pasal tlin lonak na pom thei loah teh zosaw a pom ve ding!
Thil ziangkimah na pasal sinak theih fiang tum awla, nan innsung cu Vanramah na canter thei ding. Curuangah a si, kan Bibie ca sungah nupi pawl cu pasal duhdaw dingih a fiai (Eph.5:22).
Kan neihawk pekte ah cun Charlie cu ka duh zawng rori umter ka rak tum. Ka ninzet mi pakhat cu ni tinte a sumdawnpi pa thawn phone in an be-aw ringring. Ni khatah veihra hnakih tam tla an be-aw: an be-aw rei thei nasa si. Nuam ka ti lo zet. A hmaisa-ah cun phone kaiíh Charlie in a tikcu a hman tamtuk cu ka thik bik.
A pahnihnakah kan paisa hmuahhmuah a hmang cem ṭheh pang ding ti ka phang. Ni khat cu kan sungkaw thu theizet, sumdawng pakhatin phone in i rak bia. Kan pa (Charlie) cu a hnaṭuanah a buaituk ti a theih ruangah a thucah duh mi cu keimah i cah tum hi a rak si.
"Na pasal hi a duh vekvekin sum dawnnakah cangvaiter hnik aw, a paisa hman thuah kam khat-te hman rak ṭong citcet ve nawn hlah, a tel khal tel hlah aw. Coka lam kha ṭhaten rak kilkhawi men aw i run ti cuteh. Ka thin a heng dan cu! A so ut o a si bik mai. Asinan, cu pa cun thudik i rak sim ziar a si ti lehhnu lawngah ka thei.
Charlie cu kan sungkaw cawmtu le kan hotu bik a si ti ka rak theifiang lo nasa. Hi thu ka theih mi hin ka atzia a langter ih, tu-ah cun ka ruah dan ka thleng ṭheh. Cuisi cun kan pahnihin kan ai a puang sinsin. Ka pasalih thil tum le khawkhan dan cu ka thlun vivo mai. Ka bom thei lo hmanah a thu ka el dah nawn lo.
Nu pakhatin an pai’ hnenah thiam co zetin, “zarh hnih sung hrawng cu kan innsangah danglamnak ka thlen zo nan, nang lawngte na danglam thei ve lo a si hi” a ti. A pasal ve thung cun, “Tui hlan khalah zarh hnih sung hrawng hi cu na danglam ve ṭheu ko; na danglam ngaingai maw ngai lo ti ka lo zoh hrih a si hi” a rak tive.
Zarh hnih khat danglam duak si loin, danglamnak taktak, kumkhaw daih danglamnak a si nan innsangin a ṭul mi cu.
0 comments:
Post a Comment